तिहार बिदामा फुल बेच्दै शिक्षक बिद्यार्थी

अर्घाखाँचीमा तिहारको बिदामा पनि फूल बिक्रीमा व्यस्त शिक्षक र विद्यार्थी
​अर्घाखाँची, कार्तिक २४ — तिहारको समयमा विद्यालयहरू सुनसान हुनुपर्ने हो, तर सन्धिखर्क नगरपालिका–८ पकलेस्थित जनताकृष्ण माध्यमिक विद्यालयका शिक्षक र विद्यार्थीहरूलाई भने अहिले फूल टिपेर बिक्री गर्ने भ्याइभ्याइ छ। विद्यालय नजिकैको दुई रोपनीभन्दा बढी क्षेत्रफलमा गरिएको फूलखेतीबाट उनीहरूले तिहारको बेला राम्रो आम्दानी लिइरहेका छन्।
​विद्यालयमा कक्षा ९ देखि १२ सम्म बाली विज्ञान विषय अध्ययन गर्ने ६० जना विद्यार्थीहरूले रोगाइदेखि गोडमेल, सिँचाइ, मलखादको व्यवस्था र रोगकिराबाट जोगाएर यो फूलखेती हुर्काएका हुन्। उनीहरूले किताबको ज्ञानसँगै प्रयोगात्मक सिकाइ हासिल गर्न र कृषि उद्यमबाट स्वरोजगार बन्न सकिन्छ भन्ने सन्देश दिन यो खेती गरेका हुन्।
​तिहारका लागि फूल किन्न सन्धिखर्कबाट व्यापारीसहित ग्राहकहरू स्कुलमै पुग्ने गरेका छन्। दिनभर शिक्षक र विद्यार्थीहरू फूल टिप्दै बिक्री गर्न व्यस्त हुन्छन्। सोमबार मात्रै आठ जना विद्यार्थी र पाँच जना शिक्षकले दिनभर फूल टिपेर बिक्री गरेका छन्। सयपत्री फूल प्रतकिलो ३०० रुपैयाँमा बिक्री भइरहेको छ भने अहिलेसम्म एक लाख रुपैयाँभन्दा बढी आम्दानी भइसकेको विद्यालयका सहायक प्रधानाध्यापक प्रकाश भुसालले बताए।
​विद्यालयका सहायकप्रअ भुसालले विद्यार्थीहरूले किताब मात्रै नभई कोदालो बोकेरै बारीमा प्रयोगात्मक काम गर्नुपर्ने र यसले कृषि उद्यमबाटै भविष्य उज्ज्वल छ भन्ने सन्देश दिने बताए। यहाँ फूलबाहेक मौसमी तथा बेमौसमी तरकारी, अन्नबाली र च्याउ उत्पादन गरेर समेत बिक्री गर्ने गरिएको छ। विद्यालयको होस्टेलमा बसेर पढ्ने हंशपुरकी रोजिता थापालगायतका विद्यार्थीहरूले पनि बारीमा रसिलो जोेड दिँदै कृषि खेतीमा सक्रियतापूर्वक सहभागिता जनाएका छन्।