Brúðarbúningurinn: Sýningarspjall þjóðminjavarðar og meistara í kjóla- og búningasaum

Name: Brúðarbúningurinn: Sýningarspjall þjóðminjavarðar og meistara í kjóla- og búningasaum
Start: 2026-05-10T14:00:00+00:00
Location: Þjóðminjasafn Íslands/ National Museum of Iceland

Schedule

Sun, 10 May, 2026 at 02:00 pm

UTC+00:00

Location

Þjóðminjasafn Íslands/ National Museum of Iceland | Reykjavík, RE

Einn ríkulegasti kvenbúningur í sögu landsins var lengi talinn hafa glatast í skipsskaða undan ströndum Íslands árið 1809. Síðar kom í ljós að svo var ekki og árið 1963 fannst búningurinn óvænt í safni Viktoríu og Alberts í Lundúnum. Sá fundur markaði tímamót í íslenskum búningarannsóknum.
Sýningin „Með sögu í farangrinum - Brúðarbúningurinn" stendur yfir frá 9. maí 2026 til 9. maí 2027. Sýningarspjallið er hluti af dagskrá HönnunarMars sem fer fram dagana 6.-10. maí 2026.
Þann 10. maí kl. 14 munu Harpa Þórsdóttir þjóðminjavörður og Guðrún Hildur Rosenkjær, sagnfræðingur og meistari í kjóla- og búningasaum, ræða handverkið að baki brúðarbúningnum.
Guðrún Hildur hefur um árabil helgað störf sín rannsóknum, endurgerð og miðlun íslenskra búninga. Í verkum sínum sameinar hún fræðilega heimildarýni og verklega rannsóknaraðferð þar sem hún endurgerir búninga, efni og vinnuaðferðir til að varpa nýju ljósi á þætti sem ritaðar heimildir einar ná ekki að skýra. Í samstarfi við gullsmiðinn Ásmund Kristjánsson, sem hefur endursmíðað skart búningsins, hefur hún rannsakað brúðarbúninginn í þaula og lagt fram mikilvæga þekkingu á gerð hans og efnivið.
Guðrún hefur jafnframt rannsakað sögu Guðrúnar Skúladóttur, „Blómstranna móður“, sem var annáluð fyrir framúrskarandi saumaskap og eru verk hennar varðveitt í Þjóðminjasafni Íslands, en pilsið á brúðarbúningnum á sýningunni er hennar verk. Í spjalli þeirra Hörpu mun Guðrún Hildur meðal annars segja frá helstu uppgötvunum sínum við rannsóknir á búningnum, veita innsýn í saumaskapinn sjálfan og beina sjónum að samfélagslegri stöðu Guðrúnar Skúladóttur og annarra kvenna á hennar tíma.

Sýningarspjallið fer fram á íslensku.
Aðgöngumiði í safnið gildir á viðburðinn. Athugið að aðgöngumiði jafngildir árskorti í safnið og aðgangi á alla viðburði og sýningar safnsins gegn framvísun kortsins.
Ókeypis er á sýningar og viðburði fyrir börn að 18 ára aldri.