Syed Shiraji Shah Bawa Kalariya Sharif
Schedule
Fri, 03 Apr, 2026 at 12:00 am
UTC+05:30Location
Jaiprakash Nagar | Rajkot, GJ
Advertisement
Urs Mubarak SHAHENSHAH E KATHIYAWAD QUTBUL AQTAB HAZRAT SAYYED MOHAMMAD SWALEH SHIRAZI radiyallahu anhu (Urs : 17, Rabiul Awwal, Mazar : Kalariya Sharif, Gujarat)“AAPKI PAIDAISH MUBARAK”
Aapka Mubarak Naam HAZRAT SAYYED MOHAMMAD SWALEH rehmatullah alayh he. Aapke Alqaab SHAHENSHAH E KATHIYAWAD, QUTBUL AQTAB, SHAMSUL MASHAIKH vagera he. Aap ki Vilaadat Sharif 3 Moharram 1000 Hijri ko Subah saadiq ke waqt Shiraz (Iran) me hui. Aapke Vaalide Maajid ka Mubarak Naam HAZRAT SAYYED MOHAMMAD ALI bin INAYATULLAH aur Vaalida Maajida ka Naam HAZRAT SAYYEDA BIBI AAMENA binte SAYYED JAMALUDDIN MOHAMMAD HAMVI he. Ridvanullahi alayhim ajmain. Aap Vaalid ki Janib se HAZRAT SAYYEDNA IMAM MOOSA KAAZIM radiyallahu anhu ki Aulade Paak me se he aur Vaalida Maajida ki janib se HASANI Sayyed he.
“VILADAT KI BASHARAT”
Aapki Viladat sharif se Pehle hi RASOOL E AKRAM ﷺ ne Aapke Vaalide Girami ko Khwab me Basharat di ke Tumhare yaha jo Beta aane wala he uska Naam MOHAMMAD SWALEH rakhan aur uski Taalimo Tarbiyat Baghdad me karana. Wo Bacha QUTB E ZAMA hoga
“TAALIM O TARBIYAT”
Aap ko bachpan se hi khel kood me dilchaspi nahi thi. Aap ne apne Vaalid se ibtidaai ta’aleem haasil ki. 5 saal ki umr me Haafize Qur'ān hue. Phir aap ke Vaalid ne Aap ko Baghdad shareef bheja. 12 saal ki umr me Aap Aalim bane. 20 saal ki umr me Aap ne tamaam uloom ki ta’aleem mukammal kar li.
“HUZUR GAUSE AAZAM radiyallahu anhu KI BASHARAT”
Ek din Aap 27 Ramazaan ki shab ko ibaadat me mashgool the. Saheri kar ke aaraam farma rahe the tab SULTANUL AULIA HUZUR SAYYEDNA GAUS E AAZAM radiyallahu anhu ka farmaan hua ke “Eid-ul-Fitr ke baad Baghdad aao.” Eid ke baad Aap Shiraz se Baghdad pahunche.
“BAIT O KHILAFAT”
Baghdad Sharif me 11 Shawwaal ko namaaze zohar me HAZRAT SAYYED SHAH JAMALUDDIN MOHAMMAD QADRI radiyallahu anhu se mulaaqaat hui. Aap Hazrat se bait hue. Hazrat ne Aap ko Qaadri silsila ki khilaafat ata farmai aur Ek khirqa, amaama aur HUZUR GAUSE PAAK ki ek tasbeeh ata farmai. Is ke baad Aap bahot saare buzurgo se faiz aur khilaafat haasil ki. Aap ko 14 silsile ki khilaafat mili hai.
“HUZUR ﷺ KI BASHARAT AUR MADINA SHARIF ME HAZRI”
Ek din HUZUR ﷺ ne khwaab me Aapko bashaarat di ke “Hindustan ke Kathiawaad me ek maqaam par musalmano ko qatl karke bali chadhaaya jaata hai. Tum waha jaao aur mazloomo ki madad karo.” Aap apne waalid, apne bhaiyo aur chand mureedeen wa moataqideen ke saath Madeena munawwara pahunche aur Roza mubarak par haazir hokar salaam pesh kiya “Assalamu alaikum ya Jadadi.” To jawaab mila “Wa alaikum ya Waladi.” Phir ek nooraani haath baahar aaya. Aap us mubarak haath ko bosa diya.
phir arz kiya “Huzoor! Aap ki baargaah me 25 martaba haazir hona chaahta hu.” Is ke baad 170 saal ki umr ki arz ki. Is tarah Aapne 180 duaen maangi. HUZUR ﷺ ne farmaaya “Tum jo chaaho maang lo.” Phir farmaaya “Baghdad ja kar apni amaanat le lo aur phir Hindustan jaakar khidmate deen karo.”
HUZUR ﷺ ke farmaan ke mutaabiq Aap Baghdad tashreef le gaye. Jab Aap SARKAR GAUSE PAAK radiyallahu anhu Rozae Paak par pahonche to roza mubarak se aawaaz aai ke “Apni amaanat le lo.” Phir roza mubarak se chaar aadami ek sandooq lekar aaye aur aap ke saamne rakh di. Phir roza mubarak se aawaaz aai “Ise apne saath le jaao. Is se tumhe apna raasta aur maqaam dhundhne me aasaani hogi.”
11 din Baghdad me qayaam farmakar Aap 4 shakhs ke saath Hindustan ke liye rawaana hue.
“HINDUSTAN ME TASHRIF AAVRI”
Safar karte hue 1037 Hijri me Aap Sindh pahunche aur waha se Kutch tashreef laaye. Kutch me kuchh din qayaam farmakar ta’aleem wa tablighe deen karte rahe. Phir Aap aage safar karte hue ek maqaam par pahunche jaha sandooq ko neeche rakha gaya to phir se use utha nahi sake. Aap ne farmaaya “Yeh wohi maqaam hai jis ke baare me mujhe farmaaya gaya hai.” Yaha ek bada mandir tha. Aap ne apne Peer o murshid se mashwara karke Sanskrit zaban me ek khat likhkar us Mandir ke Poojaari ko bheja. Poojaari us khat ko lekar Jaagbaai Chaaraniyani (Jo Musalamno ki Bali chadhata tha) ke paas gaya aur khat padhkar sunaaya ke
“Musalmano qatl karna aur zulm karna band kar do warna tumhari khair nahi hai.” Yeh sunkar Jaagbaai ne ghusse me aakar kaha “Us faqeer se keh do ke yaha se chala jaaye. Isi me uski bhalai hai.” Aap ne farmaaya “Faqeer jaha baithta hai waha se jaata nahi.” Phir aap ne apni jooti mubarak uthai aur kaha “Jaa, sab ki khabar lekar aa.” Wo jooti hawa me udkar Jaagbaai ke paas pahunchi aur uske sar par 3-4 baar takrai, phir uske tamaam saathi ke sar par hoti hui aakhir me Poojaari ke sar par 3 baar maarkar waapas aai. Aap ne farmaaya “Koi baaki to nahi reh gaya.” Jooti phir se gai aur ek shakhs (jo baad me aaya tha) ke sar par maarkar waapas aai.
Is ke baad Aap ne dobaara ek khat likha ke “Agar tum sab zulm karna chhod do aur islaam apna lo to amaan paaoge.” Yeh padhkar Poojaari ghusse me aakar aap ko bhala bura kehne laga aur kaha ke “Yaha se chale jaao warna jung ke liye tayyaar ho jaao.” Aur aap ki taraf ek teer chalaaya. Jab aap ne teer ki taraf nazar daali to woh Poojaari ki taraf waapas palat gaya aur uske pair me choobh gaya. Subah ko Poojaari apne lashkar ke saath jung ke liye aaya. Hazrat ke saath 63 log the jin me jung kar sake aise 37 log the.
Aap ke saathiyo ne kaha “Huzoor! Hamare paas talwaar nahi hai.” Aap ne baans ki lakdiyo ki talwaar banakar di. Zirah [Bakhtar] ke liye arz ki to Aap ne farmaaya “ALLĀH ta’ala ke fazl se hamara libaas hi hamara bakhtar hai.” Poojaari aur uske saathiyo ne pehle jaadoo karne ki koshish ki lekin nakaam rahe kyun ki jab Hazrat ki jooti mubarak unke sar par lagi thi usi waqt unka jaadoo khatm ho gaya tha. Phir unho ne Aap par hamla kiya. 3 din tak ghamaasaan jung hui jin me ek musalman shaheed hua aur Poojaari aur uske saare saathi maare gaye.
“KHIDMATE DEEN”
Is ke baad Aap ne jaha par sandooq rook gaya tha waha par ek makaan ta’ameer kiya aur farmaaya ke “Is jagah ko paak saaf rakhna aur mere baad yaha maqabara ya chilla banaana nahi.” Aur us ke saamne ek masjid aur Madrasa Daar-ul-Uloom Qaadariya Shirazi ta’ameer kiya. Jis me Aap aur aap ke bade saahabzaade Kaamun Shaah aur aap ke 4 khulfa ta’aleem wa tadrees karte the. Aap apne shaagirdo ko kushti, teerandaazi aur ghud sawaari bhi sikhaate the.
Aap jayyaad aalim wa mohaddeeṡ, hafiz o qaari aur shaayar the aur Qur'ān, Hadeeṡ, Tafseer, Fiq'h aur Tasawwuf ke maahir the. Aap ko taqreeban 1,00,000 hadeeṡ yaad thi. Aap ne apne haatho se ek Qur'an majeed, Soorah Yaseen shareef, Dalaa'il-ul-Khairaat, aur Durood-e-Mustaghaaṡ likha hai.
Aap ke daste mubarak par 1,32,000 log islaam me daakhil hue aur 930 ko aap ne apne faiz se maqqame Wilaayat par pahunchaaya.
Aap daste mubarak par jo bhi musalman hota use aap 7 baato ki naseehat wa taaqid farmaate :
[1] ALLĀH ta’ala aur uske Rasool ki ita’at karna aur ahkaam ki paabandi karna,
[2] Har haal me namaaz ada karna,
[3] Har haal me sabr se kaam lena,
[4] Jhut mat bolna,
[5] Hamesha halaal rizq khaana aur khilaana,
[6] Khaamoshi apnaana,
[7] Islaam sikhaate rehna.
“AAPKE AKHLAQE KARIMANA”
Aap narmi, saadgi aur khaamoshi pasand farmaate the. Aap saahibe taqwa wa parhezgaar the, paabande shariat the aur har kaam Sunnate Rasool ke mutaabiq karte the. Din me sirf ek martaba thoda doodh ya khaana khaate. Saada libaas pehante the. Aap kheti karte aur anaaj farokht karte. Aap ki baargaah me aane waale har shakhs se achha sulook karte, pehle paani pilaate phir khaana khilaate, us ki baat sunte aur use madad farmaate.
Aap sab ko namaaz ki paabandi ki taaqid farmaate. Aap farmaate ke “Be-namaazi ke liye ALLĀH ka sakht azaab hai.” Aur farmaate “Jis ki namaaze fajr chhoot gai us ka pura din kharaab aur jis ki namaaze ishaa chhut gai us ki puri raat kharaab.” Jab koi aap ke paas taaweez lene ke liye aata to agar makrooh waqt na ho to aap use 2 rak'at nafl namaaz padhaate aur phir taaweez dete. Aap ki khidmat me rookne waale mureed o moataqid me se kisi ki bhi namaaze fajr qaza ho jaaye to aap pura din baahar mehfil me tashreef nahi laate aur kisi se baat bhi nahi karte.
“IBADAT O RIYAZAT”
Aap roz 1000 rak'at nafl namaaz padhte. Kaṡrat se Durood shareef padhte. Aap ne 25 Martaba Hajj ada karne ki sa’adat haasil ki.
Aap Maahe Rabi-ul-Awwal me 12 din tak har roz raat ko aur namaaze fajr ke baad mehfile meelaad munaaqid karte aur nyaaz taqseem karte. 12wi shab ko puri raat Durood shareef ki mehfil hoti aur HUZUR ﷺ ke baal mubarak ki ziyarat rakhte. Maahe Rabi-ul-Aakhir me 17 roz tak mehfile meelaad munaaqid karte aur nyaaz taqseem karte. Maahe Moharram me 10 roz tak Qur'ān khwaani aur Durood shareef ki mehfil munaaqid karte aur nyaaz taqseem karte.
“EK JAADUGAR KA QUBULE ISLAM”
Ek martaba Aap tabligh e deen ke safar par the. Raaste me Jiva naami ek Koli jaadoogar se mulaaqaat hui. Us ne aap se safar ka maqsad puchha aur kuchh der guftagu ke baad us ne kaha “Aap peer hain, islaam ke muballigh hain. Aap ne yeh kya kiya?” Aap ne kaha “Kyun kya hua?” Us ne kaha “Aap ne mera saara jaadoo khatm kar diya.” Aap ne farmaaya “Aisa jaadoo kis kaam ka ke jo mere jaise faqeer se baat karte karte chala jaaye. Aisa ilm sikho jo dunya aur aakhirat dono me kaam aaye.” Us ne kaha “Main jaadoo is liye sikha tha ke us ke zariye apne pariwaar ka guzaara kar sakun. Ab hamara guzaara kis tarah hoga.” Aap ne farmaaya “Us khuda ki Qudrat par bharosa rakho jo sab ko jilaata hai aur maarta hai aur sab ko rozi deta hai aur sab ka maalik hai.” Aap ki ta’aleem aur dua se woh jaadoogar musalman ho gaya aur aap ka mureed hua. Aap ne us ka naam ‘Abdul Khaaliq’ rakha aur us ki biwi ka naam ‘Faatima’ rakha. Aap ki nazare tawajjoh se woh Wali ban gaya.
“EK SADHU KA QUBULE ISLAM”
Ek martaba Aap Kalariya ke qareeb Rodhel gaanv me tashreef le gaye. Yaha ek Taantrik Sadhu ki jhonpadi me aap thehre. Aap ne us sadhu ko paani laane ke liye bheja. Is dauraan baat me kisi ne Huzoor sallallāhu alaihi wa sallam ka naam liya. Jise sunkar aap wajd me aa gaye. Jab woh Saadhu paani lekar waapas aaya aur aap ko pesh kiya. Aap ne koi jawaab nahi diya. Usne dobaara kaha. Jab teesri baar us ne kaha to Aap ne aalame wajd me farmaaya “Main bhi shaah aur tu bhi shaah, Jaa Shaahdullāh Shaah.” Phir aap ko apne seene se lagaaya to us saadhu ka seena roshan ho gaya. Phir us ke sar par haath phera to us ke baal jo badhe hue the woh gir gaye. Phir us ke naakhoon par apna luaab e dahen lagaaya to badhe hue naakhoon nikal gaye. Aur woh Hazrat ka mureed ban gaya. Aap ne use Qaadri Shirazi silsila ki khilaafat ata farmai. Aur woh Hazrat ke saath khidmate deen ke liye nikal gaye. 30 saal tak Hazrat ki khidmat me rahe. 5 martaba Hazrat ke saath paidal Hajj ada kiye. 1 Rabi-ul-aakhir 1106 Hijri ko Rodhel me un ka wisaal hua.
“MITTI PAR KULLI KI WO SONA BAN GAI”
Ek martaba ek Saadhu Aap ke paas aaya aur ek botal dikhakar kaha “Is me qimiya hai jis se sona bana sakte hain. Maine kai saal tak mahenat karke ise banaaya hai.” Aap ne farmaaya “Faqeero ko sone se nisbat nahi hoti.” Woh saadhu zid karne laga. Aap ne us ke haath se botal li aur phenk di. Woh ghusse me aakar bola “Aap ne meri barso ki mahenat bekaar kar di.” Aap ne farmaaya “Tumhari botal wahi padi hai.” Us ne kaha “Kaanch ki botal deewaar se takrakar toot gai hogi.” Aap ne farmaaya “Jaakar zara dekho to sahi ke botal ka kya haal hai.” Us ne wha jaakar dekha to botal koode me padi hai aur itni badboo aa rahi hai ke saans lene me dushwaari ho rahi hai. Us ne waapas aakar kaha “Yeh kya muamala hai?” Aap ne farmaaya “Tum ne itne saal mahenat karke kooda banaaya hai. Mere saath aao, main tumhe sona banaane ka aasaan tareeqa bataata hu.” Woh aap ke saath nadi ke kinaare gaya. Aap ne wuzu kiya aur munh me paani lekar nadi ki ret par kulli ki. Saadhu ne dekha ke jaise hi paani ret par gira woh sona ban gai. Woh saadhu kalma padhkar musalman ho gaya. Aap ne woh sona use diya to us ne kaha “Ab mujhe sone ya heere jawaahiraat ki zaroorat nahi.” Aap ki nazare tawajjoh se woh Wali ban gaya. Aap ne woh sona khairaat kar diya.
“AAPKA ILM E GAIB”
Ek martaba Nagar Thattha, Sindh me apne ek mureed ke yaha qayaam farma the. Aadhi raat ko ek taaweez banaaya ur mureed ko jagakar diya aur farmaaya “Achhe miyan! Kal subah mujhe Makali Qabrastan jaana hai. Mere jaane ke baad ek aurat aayegi. Uske shohar ko pait ki beemaari hai. Bahot dawa karaane ke baad bhi koi aaraam nahi hua hai. Use yeh taaweez dekar kehna ke is taaweez ko pehanne se in shaa Allāh theek ho jaayega.” Subah ko namaaze fajr ke baad Aap apne aaba o ajdaad ki qabr par faatiha khwaani ke liye Makali Qabrastan tashreef le gaye. Baad me ek aurat aai aur Achhe miyan se kaha “Aap ke yaha Shirazi Shaah baaba aaye hain?” Achhe miyan ne puchha “Hazrat se kya kaam hai?” Us aurat ne kaha “Hum log bahot ghareeb hain aur mere shohar ko pait ki beemaari hai. Us ke liye taaweez lena hai.” Achhe miyan ne kaha “Hazrat ne kal raat hi achaanak uthkar aap ke liye taaweez banakar de diya hai.” Woh aurat taaweez lekar gai aur apne shohar ko pehnaaya. ALLĀH ke fazl se us ka shakhs ka pait ka dard gaayab ho gaya aur woh bilkul theek ho gaya.
“MURID KI MADAD”
Iran me Aap ke ek mureed ko gale me bahot bada phoda hua. Hakeemo aur tabeebo ne is phode ko la-ilaaj bata diya tha. Ek raat us ne madad ke liye arz ki “Ya Peer al-Madad.” Apne peer o murshid ko yaad karte karte woh shakhs so gaya. Raat ko khwaab me us ne dekha ke Hazrat tashreef laaye aur farmaaya “Fikr mat karo. In shaa Allāh sab theek ho jaayega. Kal subah tum neem ka miswaak karna. Namaaze zohar ke baad so jaana aur namaaze asr ke baad Ghauṡe paak ka naam lekar phir se neem ka miswaak karna.” Dusre din us ne Hazrat ke farmaan ke mutaabiq kiya. Usi din uska phoda phoot gaya aur use aaraam ho gaya.
“BE AULAD KO AULAD ATA FARMAI”
Ek martaba Aap Maliya Miyana me Gul Mohammad Miyana naami mureed ke yaha tashreef farma the. Us ke yaha koi aulaad nahi thi. Lekin Hazrat ko baat karne ki himmat nahi hoti thi. Jab aap aaraam farma rahe the tab us ki biwi Haleema (jiski umr 46 saal thi) aap ke sirhaane khadi hokar rone lagi. Aap ne kashf ke zariye rone ki wajah jaan li aur farmaaya “Jaa beti! Tere yaha 3 bete aur 2 betiya hogi in shaa Allāh.” Aap ke farmaan ke mutaabiq ALLĀH ke fazl se un ke yaha 3 bete aur 2 betiya hui.
“SARKAR AALA HAZRAT KI PAIDAISH KE 170 SAAL PEHLE HI UNKI BASHARAT”
4 Rabi-ul-Awwal 1102 Hijri ko Aap Madrasa me talba ko dars de rahe the. Achaanak aap khaamosh hokar bagal me haath daalkar baith gaye. Kuchh der baad Aap ne kaha “SubhanALLAH Alhamdulillah ALLAHU Akbar” Phir talba se irshaad farmaaya “14wi sadi me baatil firqe waale azmate Rasool par gustaakhi karne ki aur gumraahi aur fitne phailaane ki koshish karenge tab AHMED naami ek shakhs un ka muqaabala karega aur un se qalami jihaad karega aur ALLĀH ta’ala ke fazl se fateh haasil karega. Use ALLĀH ta’ala aur uske RASOOL ﷺ khoob madad farmaenge. Woh paabande shariat hoga aur wilaayat ke a’ala maqaam par faa'iz hoga. Woh HUZUR ﷺ aur ahle bait ki bahot ta’azeem karega. Woh needar hoga aur Deen ke liye ikhlaas ke saath kaam karega. Meri Aal Aulaad aur mureedeen us se aqeedat rakhen aur uske maslak par qaa'im rahen kyun ki us ka raasta ALLĀH aur uske RASOOL ﷺ ka raasta hoga jise sahaaba e kiraam, taabi'een, mujaddid aur auliya allāh ne apnaaya hai.”
Aap ki bashaarat ke mutaabiq 170 saal baad IMAM E AHLE SUNNAT MUJADDID E DEEN O MILLAT AALA HAZRAT ASH SHAH IMAM AHMED RAZA KHAN FAZILE BARELVI radiyallahu anhu ki Viladat Sharif hui aur unhone baatil firqo ka muqaabala karke Maslak e Ahle Sunnat wal Jama’at ki hifazat ki.
“NIKAH VA AULAD E PAAK”
Aap ka nikaah Haleema Bibi binte Sayyed Shaah Muhammad Ahmad Qaadri Jilani se hua. Aap ke 12 saahabzaade aur 4 saahabzaadiya hain.
“VISAAL SHARIF KA WAQIA”
17 Rabi-ul-Awwal 1170 Hijri ko Aap ne namaaze Tahajjud ke baad ghusl kiya aur phir Dalaa'il-ul-Khairaat, Dua e Hizb-ul-Bahr, aur Yaseen Qaadariya Shiraaziya padhi. Phir fajr ki azaan di aur namaaze fajr padhai. Phir Qabrastan tashreef le gayr aur apni waalida ke mazaar par, apne 4 khulfa ke mazaar par aur apne saahabzaade HAZRAT SAYYED KAAMU SHAH ke mazaar par faatiha khwaani ki. Phir HAZRAT JORAWAR SHAH PIR ki dargaah par jaakar faatiha khwaani ki. Phir us maqaam par aaye jaha aap ka mazaar hai aur 2 rak'at namaaz padhi. Phir gaanv me aakar apne peer HAZRAT SAYYED JAMALUDDIN MOHAMMAD QADRI Alayhirrehma ke mazaar par haazir hokar faatiha khwaani ki. Phir apni deli me aakar kuchh der muraaqaba kiya.
Phir khaanqaah me aakar apne pote HAZRAT SAYYED MEER SHAH ko aur mureedo aur moataqido ko naseehat farmai “Eimaan par qaa'im rehna, ALLĀH ta’ala aur us ke RASOOL ﷺ se mohabbat karna, ahle bait ki ta’azeem karna, saadaat ka dil kabhi na dukaana, kabhi bhi sabr ka daaman mat chhodna, kaṡrat se durood shareef padhte rehna, apne dar aane waale ki haajat puri karna, ilme deen sikhte rehna.” Phir kuchh der aaraam kiya. Phir zohar ki azaan di aur zohar ki namaaz padhai. Phir KABIR bin YAQOOB SUMARAH ko bulaaya aur Sumarah qaum ke liye dua farmai. Phir duroode ibrāheemi padhna shuru kiya. Is ke baad 11 martaba 5 kalma padhen. Phir aankhen band ki aur inteqaal farmaaya.
“VISAAL SHARIF VA MAZAR E PAAK”
Aap ka wisaal 17 Rabi-ul-Awwal 1170 Hijri ko Peer ke roz 170 saal ki umr me hua. Aap ka mazaar Kalariya (Gujarat) me hai.
(Hazrat Shirazi Bawa)
~~~~~~~~~~~~~
Advertisement
Where is it happening?
Jaiprakash Nagar, Rajkot, Gujarat, IndiaEvent Location & Nearby Stays:
Know what’s Happening Next — before everyone else does.