Ofurkonan vs. tradwife

Konur búa í dag við meira frelsi og fleiri tækifæri en kynslóðirnar á undan. Á sama tíma upplifa margar þeirra kröfur um að standa sig fullkomlega í námi og starfi, sinna börnum og fjölskyldu, eiga óaðfinnanlegt heimili, rækta samböndin og helst sjálfar sig líka. Undanfarin misseri hafa hugmyndir um hefðbundið fjölskyldulíf og kynhlutverk sótt í sig veðrið og fyrir sumum virðast þær jafnvel fela í sér ákveðna uppreisn gegn hraða, álagi og kröfum nútímasamfélagsins.
Hvað segir það okkur? Eru kröfur til kvenna að breytast? Hvernig hefur móðurhlutverkið breyst? Og hvert er hlutverk stjórnmálanna? Hvernig sköpum við samfélag þar sem konur og fjölskyldur geta lifað góðu lífi – án þess að svarið við álagi samtímans verði afturhvarf til gamalla kynhlutverka?
Sóley Tómasdóttir og Sunna Símonardóttir ræða móðurhlutverkið, femínisma og fjölskyldupólitík framtíðarinnar.
Sunna er lektor í félagsfræði við Háskólann á Akureyri. Hún hefur sérhæft sig í rannsóknum á foreldrahlutverkinu, kyngervi og fæðingartíðni.
Sóley er uppeldis-, kynja- og fjölbreytileikafræðingur. Í störfum sínum hagnýtir hún rannsóknir í kynja- og fjölbreytleikafræðum i bland við eigin reynslu af aktívisma, stjórnmálum, viðskiptum og rekstri.
Eftir erindi frummælenda verður gefinn góður tími til umræðna.
Hlökkum til að sjá sem flest á fundinum! Fólk af öllum kynjum velkomið og endilega bjóðið nýju fólki með á fundinn!